BERRIA. Aitor Renteria. Milafranga

Lapurdin AHT abiadura handiko trenaren bide berririk ez dutela nahi adierazi zuten igandean Lehuntze, Hiriburu eta Milafrangak. Europako hauteskundeen karietara AHTari buruzko erreferenduma antolatu zuten hiru herrietan. Bozkatzeko eskubidea zeukaten 1.711 herritarretatik 613k bozkatu zuten Lehuntzen. 501 lagunek bozkatu zuten AHTaren kontra -bozen %82,2-. Hiriburuari dagokionez, 3.531 lagunek zeukaten bozkatzeko eskubidea eta 1.184k eman zuten boza. 1.089 lagunek deitoratu zuten AHT xedea, bozen %92,68 bilduz. Milafrangak adierazi zuen AHTaren kontrako gaitzespenik handiena. 1.676 lagunek zeukaten bozkatzeko eskubidea, eta 729 lagunek eman zuten boza. Horietatik 676 lagunek bozkatu zuten kontra, bozkazaleen %93,9k.