[Itzuli/volver]

Ehundaka lagun bildu dira AHTren eta proiektu txikitzaileen aurkako egunean

Ehundaka lagunek parte hartu du joan den igandean Donostian Abiadura Handiko Trenaren (AHT) eta proiektu txikitzaileen aurka egindako egunean. Ondorio ekologiko eta sozial larriak ekarriko lituzkeen egitasmo honen oposizioan Donostialdea-Oarso-Bidasoako AHT Gelditu! Elkarlanak asteotarako eratu dituen ekintzen artean kokatu da eguna, eta datorren martxoaren 23an, Henanitik Astigarragara AHTren geldiaraztea eskatzeko egingo den manifestazioarekin izango du segida. “AHT GELDITU! DENON ESKU DAGO” lemapean egingo da manifestazio hori, eta horixe da hain justu azpimarratu nahi duguna: gure esku, herriaren esku hain zuzen, dagoela basakeria hau gelditzea.

Joan den igandeko egunaren balorazioa egiterakoan, festa eta errebindikazioa batu dituen mobilizazio egun honek k izan duen bizitasuna eta ehundaka lagunen parte hartzea azpimarratu nahi ditugu. Donostian AHTren eta proiektu txikitzaileen aurkako aldarrikapenak oihartzuna izan dezan baliagarria izan da. Arratsaldez, 300 bat lagun bildu gara kalejira, burrunbatsua egiteko, eta alde zaharreko kaleetan zebilen jendearen artean harrera oso ona izan du honek, kalejiran zehar protestaren zergatiaren berri emateko jendártean banatu diren 4000 esku orriak lekuko. Goizetik egindako bizikleta martxan berriz, 50 bat txirrindulari ibili da aldarrikapena Donostia hiri-erdialdeko kaleetan zabaltzeko. Aipagarria da, halaber, “Agua Zero en Itoitz” antzerkia ikusteko Sarriegi plazan bildutako jendetzak erakutsi duen jarrera ona.

Trinitate plazan eginiko herri bazkarian 150 bat lagun bildu gara, eta ondorengo bertso saioan bildutako jendeak antolatzaileek jarritako estalpea bete egin du. Egunean zehar, bestalde, jende ugari hurbildu da plaza honetako sarreran jarritako erakusketa informatiboa ikustera. Haurrek gogotik egin dute barre Txan Magoaren ikuskizunarekin, baita Sebastopoleko Titiriteroen tailerretan gustura jolastu ere Aldi berean, Biolur elkartearen laguntzarekin, nekazaritza ekologikoaz egindako erakusketak lurrari loturiko nekazaritzaren defentsa kaleratzeko balio izan du. Trikitilariek Jaizkibelen defentsan eginiko mozorro koloretsuek„ AHTren aurka azken urteetan egindako hainbat mobilizazio eta ekintzen bideo irudiek, talo dastaketak eta ekitaldi informatiboak (azken hori tamalez laburtuta geratu bada ere, Teresa Jauregizar Gladys del Estal Fundazioko kidea gaixo eta ezin etorrita), eguneko festagiro eta une kontrainformatiboak osatu dituzte. Aipagarria iruditzen zaigu, azkenik, eskualda mailan eraturiko egun honen antolaketan eta prestaketa lanetan 50 bat lagunek esku hartu dutela zuzenean.

[Itzuli/volver]